Quidam doctiloqui libros senis Augustini
Carpere, et aduersum condere fertur opus.
Vsque adeone bonum ingenium, et facundia diues,
Ostentare artem non aliter potuit;
5
In noua prostratas acies nisi bella cieret,
Impiaque exstinctis hostibus arma daret?
Haec pugna, incentor, mors est tua, te stylus iste
Conficit, et uerbis perderis ipse tuis.
Dumque doces quantum ualeat mens libera, monstras
10
Velle tuum tibimet sufficere ut pereas.
Verte gradum, fuge perniciem; stratosque rebelles
Oris apostolici fulmine ubique uide.
Nec te mutato defendi nomine credas.
Si pastorem ouium laedere uis, lupus es.